martes, 30 de xuño de 2020

FARO DA ESCOLA



Xa dispoñemos na biblio de exemplares do Faro da Escola deste curso no que participa o noso alumnado de 4º de Educación Primaria, un único Faro da Escola para todos os colexios de Vigo, xa que pola crise do Covid non puidemos rematar os traballos e entregalos como é debido, así que optouse por publicar unha pequenísima parte das vosas tarefas na casa e insisto no de pequenísima, porque nunha páxina do diario non se pode reflectir todo o voso esforzo e ilusión. Parabéns ao alumnado de 4º de Primaria!

mércores, 24 de xuño de 2020

FEIRA DO LIBRO

Moi boas! Mañá comeza a Feira do libro de Galicia! poderedes visitala dende o 25 de xuño ata o 4 de Xullo na rúa do Príncipe, botádelle un ollo a programación porque conta coa participación de importantes figuras da literatura infantil e xuvenil galega, autor@s de cabeceira da nosa biblio como poden ser Ledicia Costas, El Hematocrítico, Anxo Fariña, Elena Gallego, Antonio García Teijeiro ...
Tamén estará asinando a súa nova banda deseñada "A proba de Auga" Anémona de Río, autora do primeiro manga galego!



venres, 19 de xuño de 2020

FIN DO CURSO! 💪🎓🎇

Parabéns amiguiñ@s! Curso superado! Non foi doada esta situación pero vencémola (ou case) xunto coa axuda e o infinito amor das vosas familias e o  esforzo e o apoio  d@s nos@s querid@s mestr@s! E agora que? Pois agora temos por diante un fermoso verán para surfear!


Tende un libro amigo que vos acompañe nesta nova aventura estival que comeza, e se o queredes compartir facendo un video, mandando un debuxo do voso paisaxe vacacional, enviando algunha foto ou calquera cousa que se vos ocurra para compartir no blog ... nin o dubidedes! Podédelo enviar a bibliomaristasvigo@gmail.com e publicoo no blog chea de orgullo!

Deséxovos que gocedes do verán con ilusión, moitas gañas e un pouquiño de cautela tamén!
Saudiños, bicos e achuchóns lectores e virtuais! 😚


luns, 15 de xuño de 2020

CADERNOS DE ACTIVIDADES (MOLÓNS) PARA O VERÁN


Ola rapazada! Estamos a piques de rematar o curso e con máis ganas de vacacións de verán que nunca ¿non si?, nesta entrada vouvos deixar unhas recomendacións de libros e cadernos de actividades alternativos aos cadernos tradicionais de repaso, libros molóns e sobre todo moi divertidos! 

Para os máis cativos:
“El libro de los garabatos” de KóKINOS, un libro para fomentar a creatividade con propostas estimulantes para completar con debuxos, pinturas, collages...



“Juego y me conozco” é unha colección de contos creados pola recoñecida psicóloga e pedagoga francesa Isabelle Filliozat onde a través das súas actividades e propostas ademáis de pasar un rato boísimo coñecemos, identificamos e traballamos as nosas emocións.




A partir de 7 anos temos estas fermosuras “Cuentos a medias” da editora Tierra de Mu destinados  a  autor@s intrépid@s que axuden a rematar de escribir e ilustrar estes contos.



"Cuadernito de escritura divertida" de Blakie Little, Con propostas tan xeniais como as seguintes:
Saca o teu lápiz e imaxina: Que entrevistas a un piollo, o restaurante máis asqueroso do mundo, que eres o amigo dun robot, un examen no que estás obrigad@ a sacar un cero…


"No te aburras nunca más" un antídoto contra o aburrimento cheo de xogos, adiviñas, xeroglíficos... e "Crea tus propios cómics" ideal para @s que queren aprender a debuxar e escribir as súas propias historietas. Ambos da editorial Usborne.

 


Resulta que unha tal Aleksandra Mizielinska ten uns libros superchulos que son un Atlas do Mundo e un que se chama "Debaixo da terra, debaixo do auga" e resulta tamén que destes libros, que son uns tesouros de bonitos que son, pois sairon uns de actividades:

"Debajo de la tierra" Deseña unha mina de carbón, excava un túnel a través dunha montaña, completa un esqueleto de dinosauro ou visita unha cidade subterránea.

"Debajo del mar"⇨ Aprende a linguaxe dos buceadores, deseña un submarino, rescata un tesouro no fondo do mar e enfróntate aos tentáculos dun calamar colosal.




E para os menos cativos (3º ciclo en adiante) temos estas marabillas: "Laboratorio portátil de escritura"(TTT), "El mundo imaginario" de Keri Smith creadora de "Destroza este diario" (Paidós), "El  Collage de tu vida"(MTM), "Todo empieza aquí"(Plaza & Janés) e "Koob, el libro al revés"(Planeta). Diarios creativos, diarios para coñecernos mellor, libros para expresarnos a través de composicións e libros que presentan retos a nosa capacidade de imaxinar.


  

 




Saudiños lectores! 😚


  

xoves, 11 de xuño de 2020

O SUPERPODER MÁIS IMPORTANTE

O aclamado historietista galego David Rubín creou este pequeno cómic (unha historia de Superman, Krypto e a túa veciña) un agasallo ambientado nestes estraños momentos que estamos a vivir. Unha homenaxe e unha reflexión moi necesarias.

Podedes lelo facendo click na imaxe e se tedes sorte conseguilo de balde nalgunha tenda de cómics ou librería. Que o gocedes!


martes, 9 de xuño de 2020

AMAR E FICHAS DE ACTIVIDADES


Bo día pequen@s grandes lector@s! Hoxe tráiovos un libro excepcional por xentileza da editorial Palabras Aladas, responsable do  fabuloso Emocionario, e nesta mesma liña teñen o libro ilustrado AMAR que describe dun modo sinxelo corenta actitudes, valores e comportamentos que enchen de contido a verba AMAR.

Facede click na imaxe para descargar o libro e no texto de abaixo para descargar as fichas de actividades sobre o libro.




luns, 1 de xuño de 2020

PREMIOS ÓS MÁIS LECTORES 🏆


Comeza Xuño e case remata o curso, un remate distanciado polas circunstancias “coronavíricas” nas que nos atopamos pero... estas circunstancias non nos van a impedir seguir comunicándonos, lendo e festexando, así pois,  aí van as finalistas e as premiadas como clase máis lectora e alumna máis lectora do curso.

CURSOS MÁIS LECTORES:
1ºC de Primaria  (284 libros prestados)
2ºB de Primaria  (273 libros prestados)
1ºB de Primaria  (266 libros prestados)

ALUMN@S MÁIS  LECTOR@S:
Mía Barca Jaso de 1ºC de Primaria (89 libros prestados)
Hugo Pereira Gómez de 1ºB de Primaria (68 libros prestados)
Sofía Bouzas Bobos de 2ºC de Primaria (42 libros prestados)

(Datos fornecidos pola aplicación de bibliotecas escolares Abies para o curso 2019-2020)

Parabéns aos premiados e aos finalistas! Seguide lendo así de ben xa que os premios que levaredes son moito máis importantes e gratificantes que os que nós vos poidamos ofrecer e,  polo momento, aquí tendes os vosos merecidísimos diplomas acreditativos!